Швајцарците на референдум го отфрлија предлогот за ограничување на бројот на жители во државата. Според првичните резултати, иако сите гласови не се изброени, јасно е дека предлогот го одбиле мнозинството од гласачите (околу 55%) наспроти околу 45% кои гласале за ограничувањето на населението во државата.
Предлогот беше инициран од Швајцарската народна партија, која со години води кампањи насочени кон намалување на имиграцијата. Доколку беше усвоен, предлогот можеше да го доведе во прашање договорот за слободно движење меѓу Швајцарија и Европската Унија.
Поддржувачите тврдеа дека ограничувањето на населението ќе го намали притисокот врз сообраќајот, домувањето и животната средина. Сепак, многу гласачи стравуваа дека таквата мерка би предизвикала недостиг на работна сила во секторите како туризмот, здравството и грижата за стари лица.
Загриженост имаше и кај бизнис-заедницата, која предупредуваше дека Швајцарија би можела да го загуби привилегираниот пристап до европскиот пазар. Повеќе од половина од швајцарскиот извоз е насочен кон земјите од ЕУ, а пристапот до тој пазар е поврзан со почитувањето на принципот на слободно движење на луѓето.
Швајцарија денес има околу 9,1 милион жители, во споредба со 7,3 милиони во 2002 година, а 27 отсто од населението го сочинуваат странски државјани. Според предлогот, бројот на жители требаше да биде ограничен на 10 милиони до 2050 година.