Израелската војска започна воздушни напади врз јужните предградија на либанскиот главен град Бејрут, насочени кон наводен терористички команден центар.
Војската соопшти дека воздушниот напад бил насочен кон предградието Дахија, каде што се верува дека се кријат членови на Хезболах. Израелскиот министер за одбрана Израел Кац изјави дека нападот бил одговор на нападите на Хезболах врз израелската војска.
Во меѓувреме, едно лице беше убиено, а најмалку петмина беа повредени во пукотница во областа Кохав Јаир, во близина на Калкилија, во централен Израел, која потоа се прошири на областите Цур Јицак, Цур Натан и Селаит.
Според службите за итни случаи Маген Давид Адом, маж на возраст од околу 35 години бил прогласен за мртов на местото на настанот, додека две лица се тешко повредени, а три други се полесно повредени.
Во меѓувреме, израелскиот премиер Бенјамин Нетанјаху ја процени ситуацијата во регионот Шарон и ги следи случувањата, соопшти неговата канцеларија.
Израелската полиција соопшти дека еден од напаѓачите, израелски Арап од Тајбе, e убиен за време на операцијата, а безбедносните сили, заедно со армијата и безбедносната служба Шин Бет, го бараат другиот осомничен.
Полицијата, исто така, пронашла возило за кое се верува дека го користеле напаѓачите. По нападот, се огласија сирени во Зур Јицак и Зур Натан, предупредувајќи за инфилтрација на терорист, а израелските сили воведоа блокада на палестинските села во областа и спроведоа претреси во Тајбе.
Министерот за национална безбедност Итамар Бен-Гвир изјави дека доколку осомничените бидат фатени живи, тој ќе бара смртна казна за терористите, додека министерот за финансии Безалел Смотрих изјави дека нападот е предупредување за растечките безбедносни закани во Израел.