Во драматично финале исполнето со пресврти, ПСЖ ја одбрани европската круна откако по пенал-рулетот го совлада Арсенал и повторно се искачи на врвот на континенталниот фудбал.
Лондонскиот состав одлично го отвори натпреварот и рано стигна до предност. По продор по левата страна, Каи Хаверц ја затресе мрежата на ПСЖ и донесе голема радост меѓу навивачите на Арсенал. Францускиот шампион долго време не успеваше да пронајде решение за дисциплинираната игра на противникот, а Арсенал дури имаше можност и да го удвои водството пред паузата.
Во второто полувреме ПСЖ значително го зголеми притисокот. Израмнувањето пристигна по пенал досуден по интервенција на ВАР, а Осман Дембеле беше сигурен реализатор за 1:1. До крајот на регуларниот дел двете екипи создадоа неколку добри можности, но резултатот остана непроменет.
Продолженијата не донесоа победник, иако имаше возбудувања пред двата гола. Решението мораше да падне по изведувањето пенали, каде што фудбалерите на ПСЖ покажаа повеќе смиреност и прецизност.
Трагичари во редовите на Арсенал беа Езе и Габриел, чии промашувања во пенал-серијата се покажаа клучни. Со тоа парискиот гигант успеа да ја одбрани титулата и уште еднаш да потврди дека е број еден во европскиот фудбал. За Арсенал ова останува уште едно болно финале, второ загубено во клупската историја на најголемата европска сцена.