Тројца летонски алпинисти загинаа откако паднаа во близина на опасен превој на планината Мекинли во Алјаска, додека четвртиот член на експедицијата е спасен, соопштија американски официјални лица.
Летонската планинарска група соопшти дека тројца членови на експедицијата загинаа откако паднаа додека се искачуваа во близина на превојот Денали до највисокиот врв во Северна Америка, додека четвртиот член на тимот е спасен и однесен во болница, објави АП.
Според американската Национална служба за паркови, алпинистите биле дел од седумчлена експедиција која ја минувала рутата Вест Батерс, позната по своите стрмни, заледени делови. Преживеаниот алпинист беше спасен со хеликоптер од надморска височина од околу 5.240 метри, а подоцна беше однесен во болница. Останатите тројца членови на групата, кои учествуваа во спасувачките напори, исто така беа евакуирани откако почнаа да чувствуваат дека нивната физичка состојба се влошува.
Планината Мекинли е позната по своите исклучително тешки услови, ненадејни временски промени и технички тешки делови.
Превојот Денали, на околу 5.550 метри, се смета за една од најопасните точки на искачувањето, каде што се евидентирани бројни несреќи низ годините, најчесто за време на спуштањето.
Според управата на паркот, околу 1.000 до 1.200 алпинисти одлучуваат да се искачат на Мекинли секоја година, а помалку од половина успеваат да стигнат до врвот.