Трагично заврши деветчасовната потрага по 63-годишен жител на гостиварското село Форино, кој утрово бил пронајден мртов во атарот на селото Врапчиште.
Според информациите од полицијата, неговите роднини синоќа околу 21:30 часот во ОВР Гостивар пријавиле дека мажот не се вратил дома и дека не можат да го пронајдат. Тој работел како овчар на бачило во околината на Врапчиште.
По пријавата веднаш била организирана потрага, во која учествувале полициски службеници и пожарникари од Гостивар. По речиси девет часа пребарување на теренот, утрово околу 6 часот мажот бил пронајден без знаци на живот, во близина на пат што го градат приватни компании во атарот на Врапчиште.
Смртта ја констатирал лекар, а увид на местото извршиле јавен обвинител и екипа од ОВР Гостивар.
Телото е предадено на обдукција, која треба да ги утврди точните причини за смртта.