Американскиот претседател Доналд Трамп изјави дека ѝ наредил на неговата администрација да ги откаже нападите врз Иран закажани за утре, но предупреди дека може да започне „целосен, голем напад“ во „секој момент“.
Трамп рече дека катарскиот шеик Тамим бин Хамад ал-Тани, саудискиот престолонаследник Мохамед бин Салман и претседателот на ОАЕ Мохамед бин Зајед го замолиле да го одложи нападот бидејќи веруваат дека може да се постигне договор што би бил „многу прифатлив“ за САД, Блискиот Исток и пошироко.
„Тие ме замолија да го одложам нашиот планиран воен напад врз Исламската Република Иран, кој беше закажан за утре, со оглед на тоа што сега се во тек сериозни преговори и дека, според нив, како големи лидери и сојузници, ќе се постигне договор што ќе биде многу прифатлив за Соединетите Американски Држави, како и за сите земји на Блискиот Исток и пошироко. Овој договор ќе вклучува, што е важно, без нуклеарно оружје за Иран“, рече Трамп.
Американскиот претседател, исто така, изјави дека, од почит кон тројцата лидери од Заливот, им наредил на министерот за одбрана Пит Хегсет, началникот на Здружениот штаб на вооружените сили, генерал Даниел Кејн, и на американската војска да не го спроведуваат планираниот напад, но предупреди дека наредбата може брзо да се поништи доколку преговорите не успеат.
„Понатаму им наложив да бидат подготвени да продолжат со целосен, голем напад врз Иран, без оглед на времето, во случај да не се постигне прифатлив договор“, рече Трамп.