Европските берзански индекси денес се мешани, при што суровата нафта од типот Брент продолжува да паѓа и денес се тргува под 99 долари за барел, додека инвеститорите се умерено оптимисти и го очекуваат исходот од разговорите меѓу САД и Иран што би можеле да ја завршат глобалната криза со снабдувањето со енергија преку Ормутскиот теснец.
Според податоците на берзата во 9:30 часот наутро, цената на суровата нафта падна за 2,45 проценти на 92.750 долари, а суровата нафта од типот Брент падна за 2,61 процент на 98.609 долари.
Претседателот на САД, Доналд Трамп, предупреди дека неговата земја ќе продолжи со воените напади врз Иран доколку Техеран не се согласи со предлогот на Вашингтон за прекин на конфликтот.
„Ако не се согласат, бомбардирањето ќе започне и, за жал, ќе биде многу поинтензивно и во поголем обем отколку порано“, напиша Трамп во објава на мрежата Truth Social.
Портпаролот на иранското Министерство за надворешни работи изјави за CNBC во среда дека Иран разгледува предлог на САД за прекин на војната на Блискиот Исток.
Европските фјучерси за гас за јуни се тргуваа по цена од 44,005 евра за мегават-час на отворањето на берзата TTF во Амстердам денес.
Индексот DAX во Франкфурт порасна за 0,19 проценти на 24.999,50 поени, францускиот CAC 40 порасна за 0,71 проценти на 8.358,17 поени, додека FTSE 100 падна за 0,47 проценти на 10.393,59 поени, а московскиот MOEX падна за 0,41 проценти на 2.621,93 поени.
Вредноста на еврото во однос на доларот на берзата Форекс денес е 1,17645 долари.