Основниот кривичен суд Скопје соопшти дека постапувајќи по предлог на надлежното обвинителство, на 9.4.2026 година судот донел решение со кое на лицето Г.А.А., вработен како судски службеник – судски полицаец во овој суд, му определи мерка притвор во траење од 30 дена поради основано сомневање дека сторил кривично дело – Примање награда за противзаконито влијание, а кумулативно судот оцени дека постојат околности кои укажуваат на опасност од бегство, како и можноста за влијание врз сведоци и докази во текот на постапката.
Против решението не е поднесена жалба и е правосилно, посочуваат од Судот.
Дополнително, се додава, надлежното обвинителство поднесе предлог за определување мерка притвор и за лицето Ф.Џ. вработен како судски службеник – доставувач во овој суд, поради основано сомневање за помагање во извршување на кривичното дело – Примање награда за противзаконито влијание, но судот не го прифатил предлогот на надлежното обвинителство за определување мерка притвор.
-Наместо тоа, на лицето Ф.Џ., на 22.04.2026 година му определи мерка куќен притвор во траење од 30 дена. Мерката куќен притвор е определена поради основано сомневање за помагање во извршување на кривичното дело. При донесувањето на оваа мерка, судот утврди дека постојат околности што укажуваат на опасност од бегство, како и можност за влијание врз сведоци и докази. Против ова решение, јавниот обвинител има поднесено жалба до кривичниот совет на овој суд, стои во соопштението.
И покрај тоашто двајцата осомничени се вработени во овој суд, Основниот кривичен суд Скопје, се посочува, одлучуваше по предлозите поднесени против двајцата осомничени, бидејќи кривичното дело е од лепезата на кривични дела кои се судат во одделението за организиран криминал и корупција, а имајќи ја предвид судската пракса, судот не може да биде изземен.
Посредувањето требало да биде пред Апелациониот суд Скопје и пред Врховниот суд, а во врска со предмет за којшто Основниот кривичен суд Скопје донел Пресуда во која е изречена казна затвор во траење од 1 – една година за кривично дело – Неовластено изработување, држење, посредување и тргување со оружје или рапсрскувачки материи од член 396 став 1 од Кривичниот законик, наведуваат од судот.