Иранскиот режим побара од САД прекин на огнот, тврди американскиот претседател Доналд Трамп. Тој на својот Твитер профил напиша дека барањето го упатил неименуван „нов претседател на иранскиот режим“, кого го опишал како поинтелигентен од неговите претходници.
– Претседателот на новиот ирански режим, многу помалку радикализиран и многу поинтелигентен од неговите претходници, штотуку побара од САД прекин на огнот. Ќе го разгледаме ова кога Ормутскиот теснец ќе биде отворен, слободен и прооден. Дотогаш, ќе продолжиме да го ракетираме Иран, напиша Трамп.
Непосредно пред ова соопштение, Трамп рече дека крајот на војната против Иран може да биде близу.
„Наскоро ќе заминеме“, им рече Трамп на новинарите во Белата куќа, прецизирајќи дека заминувањето може да се случи „во рок од две недели, можеби три“.
На прашањето дали успешната дипломатија е предуслов за САД да го завршат она што го нарекуваат „Операција Епски бес“, Трамп рече не.
„Иран не мора да склучи договор“, рече тој, додавајќи: „Не, тие не мора да склучат договор со мене“.
Најновите изјави на Трамп беа примени со резерви, со оглед на тоа што Вашингтон даваше сосема контрадикторни изјави за крајот на војната и целите на американско-израелската операција во последните пет недели. Вашингтон претходно се закани дека ќе ги интензивира операциите ако Техеран не го прифати предлогот за прекин на огнот од 15 точки на САД, кој меѓу неговите основни барања вклучуваше Иран да се обврзе да не се стреми кон нуклеарно оружје, да го запре збогатувањето на ураниум и целосно да го отвори Ормутскиот теснец.
Израелскиот весник „Марив“, повикувајќи се на извори, објави дека Израел врши притисок врз претседателот Трамп да започне „кратка и силна“ копнена операција против Иран пред можните преговори, објави израелскиот весник „Марив“, повикувајќи се на извори.
Израелски извори велат дека израелскиот премиер Бенјамин Нетанјаху и неговите советници се за воена ескалација, верувајќи дека евентуалниот договор во оваа фаза би претставувал „јасна победа за Иран“. Израелски безбедносен извор изјави дека Израел не планира да испрати копнени сили во Иран, но дека е подготвен да обезбеди „максимална разузнавачка и логистичка поддршка“ доколку САД одлучат да преземат таков чекор.
Според весникот, израелските власти стравуваат дека Вашингтон би можел да се сврти кон преговори пред воените капацитети на Иран целосно да ослабат, поради што тие охрабруваат ограничена копнена интервенција со разузнавачка и логистичка поддршка. „Ма’ариф“ објави дека израелските власти проценуваат дека контрадикторните изјави на Доналд Трамп, помеѓу завршувањето на војната и нејзиното проширување, укажуваат на двоумење, додека САД разгледуваат две главни опции. Првата вклучува ескалација на нападите, вклучително и таргетирање на иранските енергетски објекти, особено на островот Харг и на гасното поле Јужен Парс. Втората опција се однесува на преговори за договор што би ги ограничил ракетните и нуклеарните програми на Иран, без целосно уништување на неговата воена инфраструктура.
Според проценките, потенцијалните американски напади би можеле да траат од неколку дена до една недела.
Иако промената на владата во Иран сè уште неофицијално се споменува како цел, израелските проценки укажуваат дека ова е тешко да се постигне за време на војната, особено поради отсуството на масовни протести во услови на интензивни напади. Наместо тоа, Израел наводно се фокусира на стратегија на „длабоко исцрпување“ преку напади врз економската и индустриската инфраструктура на Иран, со цел да ја ослабне земјата на долг рок. Во овој контекст, нападите врз стратешките објекти се засилени, вклучувајќи ги големите челичарници во Хузестан и Исфахан, кои се важни столбови на иранската економија. Според израелски разузнавачки извори, овие напади веќе го намалија бруто-домашниот производ на Иран за помеѓу три и четири проценти.
Весникот, исто така, наведува дека некои земји во регионот го поддржуваат продолжувањето на операциите, плашејќи се дека раното прекинување ќе го зајакне Иран и ќе го зголеми ризикот од одмазда.
Портпаролот на иранското Министерство за надворешни работи, Есмаил Багаеи, оцени дека обидите на некои американски претставници да оправдаат војна против Иран потсетуваат на идеологијата на нацизмот и фашизмот од периодот пред и за време на Втората светска војна. Багаеи го изјави ова во објава на социјалната мрежа „X“, реагирајќи на изјавата на американскиот Сенат.