Израелскиот министер за одбрана изјави дека во јужен Либан ќе биде воспоставена тампон зона и дека Израел ќе ја задржи контролата врз дел од територијата дури и по завршувањето на сегашната израелска војна против вооруженото крило на движењето Хезболах, кое е дел од либанската влада.
Израел Кац изјави дека областа што треба да се окупира ќе се протега до реката Литани во јужен Либан – околу 30 километри од границата со Израел.
Тој исто така рече дека сите куќи во либанските села во близина на израелската граница ќе бидат срушени.
Либанскиот министер за одбрана, генерал-мајор Мишел Менаса, рече дека изјавите на Кац покажуваат „јасна намера да се воведе нова окупација на либанската територија“ слична на она што се случи претходно.
Земјите од ЕУ, Канада и Обединетите нации, исто така, ја критикуваа најавата на Израел, објави Би-Би-Си.
На 2 март, Израел испрати копнени трупи во јужен Либан и истовремено изврши воздушни и артилериски напади низ целата земја, вклучувајќи делови од главниот град Бејрут, подалеку на север.
Акциите следеа по испукувањето ракети од страна на Хезболах врз северен Израел како одмазда за атентатот врз врховниот лидер на Иран кон крајот на февруари, на почетокот на американско-израелската војна против Иран.
Израел претходно извршуваше речиси секојдневни напади врз Хезболах и покрај прекинот на огнот договорен во 2024 година.
Од почетокот на март, 1.238 лица се убиени во Либан, вклучувајќи 124 деца, според либанското Министерство за здравство.
Канцеларијата на ОН за координација на хуманитарните прашања вели дека се убиени и 52 здравствени работници.