Унгарскиот премиер Виктор Орбан денес изјави дека не може да се исклучи можноста Украинците да предизвикаат штета на сопствената инфраструктура, како што е гасоводот „Дружба“.
– Украинците се способни за сè, вклучително и оштетување на сопствениот гасовод, затворање на гасоводот „Дружба“, па дури и дигање во воздух на гасоводот што транспортира руски гас до Унгарија однадвор од Украина, рече Орбан во објава на социјалните мрежи, според унгарскиот весник „Немзет“.
Унгарскиот премиер потсети дека Украинците претходно дигнале во воздух гасовод во германска сопственост што минувал низ меѓународна територија, што го нарече јасен чин на државен тероризам.
Орбан додаде дека токму затоа Унгарија мора да обрне внимание на овие ризици и, доколку е потребно, да ја заштити инфраструктурата што обезбедува снабдување со енергија.
Според него, Унгарија не е заинтересирана за политички пораки, туку за разјаснување на ситуацијата врз основа на факти, поради што Будимпешта испрати делегација на украинскиот дел од гасоводот, каде што транспортот е суспендиран.
„Би сакале да одиме на почетната точка на гасоводот Дружба, каде што беше затворен, и сакаме да видиме зошто е тоа случај. Според нашите информации, тој би можел да биде повторно отворен“, рече тој.
Според унгарскиот „Немзет“, делегацијата ја предводи Габор Чепек, кој е и шеф на комисијата за утврдување факти што го истражува случајот со гасоводот.
Негова задача е да преговара со украинската страна и да побара можност за инспекција на гасоводот на лице место.
Според Виктор Орбан, ако украинското раководство не им дозволи на унгарските експерти да влезат, тоа би покренало сериозни прашања.
„Мислам дека Зеленски е против тоа. Не нè пуштаат внатре, бидејќи би се покажало дека не ја кажуваат вистината. Ќе видиме што ќе кажат Украинците. Ако нè одбијат, тоа ќе биде еднакво на признание (на вината)“, рече Орбан.