Швајцарските обвинители ја проширија својата истрага за смртоносниот пожар во ски-бар во кој загина 41 лице, претежно тинејџери, и го додадоа градоначалникот на популарниот ски-центар Кран-Монтана на списокот на осомничени. Истрагата се однесува на пожарot што избувна за време на новогодишната забава и повреди повеќе од 100 лица, објавува Ројтерс.
Градоначалникот Николас Феро е наведен како обвинет во еден од документите на обвинителството и беше повикан на сослушување на 13 април. Тој не одговори веднаш на барањето за коментар.
Феро, кој е во 50-тите години, претходно призна дека општината не извршила неколку годишни безбедносни проверки во барот. „Длабоко жалиме за тоа. Немаше ништо што укажува дека проверките не биле извршени како што е побарано“, им рече Феро на новинарите во јануари.
Обвинителството во швајцарскиот кантон Вале потврди за Ројтерс дека нови лица се додадени во истрагата под сомнение за кривични дела, вклучително и убиство од небрежност, но не ги откри нивните имиња.
Пожарот што го зафати барот „Ле Констелејшн“ на 1 јануари е една од најлошите катастрофи во модерната швајцарска историја. Трагедијата ги затегна и односите со соседна Италија, која загуби шест свои граѓани во пожарот. Многу млади луѓе остануваат хоспитализирани со изгореници.
Настанот го потресе и профитабилниот туристички сектор. Богатото одморалиште Кран-Монтана е популарно кај француските, италијанските и американските туристи и е познато по своите сончеви скијачки патеки и терени за голф.
Истрагата на обвинителот првично се фокусираше на француските сопственици на барот, кои сè уште се под истрага. Кон крајот на јануари, таа беше проширена за да вклучи сегашен и поранешен локален функционер. Сопствениците на барот, Жак и Џесика Морети, изразија жалење за пожарот и рекоа дека ќе соработуваат со истрагата. Доколку бидат осудени, обвинетите се соочуваат со максимална казна од четири и пол години затвор.