Американскиот министер за одбрана Пит Хегсет изјави дека американско-израелската воена операција против Иран штотуку започнала и е „одлучувачка и одржлива“, нагласувајќи дека САД имаат доволно муниција и оружје за да ја спроведат кампањата колку што е потребно.
– Немаме недостаток на муниција. Нашите залихи на офанзивно и одбранбено оружје ни овозможуваат да ја спроведуваме операцијата колку што е потребно, рече Хегсет, објави NBC News.
Хегсет, исто така, нагласи дека САД имаат единствена контрола врз временската рамка на активностите во Иран и ќе го прават тоа „колку што е потребно за да се осигурат дека САД ги постигнуваат“ своите цели.
„Ние го одредуваме темпото. Ние ја одредуваме временската рамка што ја води командантот на терен“, нагласи американскиот министер за одбрана.
Тој додаде дека американските сили неутрализирале поголем дел од иранската морнарица, погодиле ракетни бази и лансери и воспоставиле „целосна доминација над воздушниот простор“. Тој нагласи дека оваа воена операција е различна од „глупавите, политички коректни војни од минатото“ и рече дека САД немаат планови да прифаќаат бегалци од регионот, нагласувајќи дека земјите од Заливот можат сами да се грижат за тоа население.
Соединетите Американски Држави и Израел го нападнаа Иран во сабота наутро, на 28 февруари, во она што беше објавено како „превентивни напади“, кои дојдоа откако неколку рунди преговори за нуклеарната програма на Иран пропаднаа, објави Танјуг. Потоа Иран започна масовни напади како одмазда против Израел и цели поврзани со САД низ целиот Блиски Исток.