Американскиот претседател Доналд Трамп денес изјави дека, врз основа на информациите објавени од Министерството за правда на САД, осудениот сексуален престапник Џефри Епстин и, како што рече, лажен автор по име Мајкл Волф, се заговориле да му наштетат нему и на неговото претседателствување.
Трамп напиша на својот профил на социјалните мрежи „Truth Social“ дека не е пријателски настроен кон Епстин. Американскиот претседател се закани дека ќе поднесе тужби против некои претставници на „радикалната левица“.
Трамп, исто така, рече дека никогаш не бил на островот на Епстин, но истакна дека речиси сите демократи и нивните донатори биле таму.
Министерството за правда на САД соопшти дека некои од неодамна објавените документи поврзани со случајот Епстин содржат лажни и сензационалистички тврдења за американскиот претседател Доналд Трамп.
Во соопштението се наведува дека документите се вклучени во јавното објавување во согласност со Законот за транспарентност на досиејата на Епстин, но дека дел од материјалот содржи неосновани тврдења што биле доставени до ФБИ непосредно пред претседателските избори во 2020 година, објави CBS.
Министерството за правда нагласува дека тврдењата не се потврдени и дека, доколку имале кредибилитет, веќе ќе биле искористени против Трамп.
Објавените записи доаѓаат од пет примарни извори, вклучувајќи судски случаи против Епстин и неговата партнерка, Џилијан Максвел, случај во Флорида во кој се истражува поранешниот батлер на Епстин, повеќекратни истраги на ФБИ и внатрешната истрага на Министерството за правда за смртта на Епстин.
Како што објави АБЦ, името на Доналд Трамп се појавува илјадници пати во досега објавените документи, а Епстин директно го споменува во некои случаи. Министерството за правда на Соединетите Американски Држави објави огромна колекција документи поврзани со Епстин, вклучувајќи повеќе од три милиони документи и фотографии, како и нова, помала транша од записи.