Голема количина боева муниција, рачни гранати и мини е пронајдена во гостиварскиот регион, откако работници ангажирани на ископ со багер наидоа на сомнителни буриња покрај локален пат меѓу селата Митрови Крсти и Симница.
Случајот бил пријавен вчера попладне во СВР Тетово. Како што информира портпаролот на СВР Тетово, Фатмир Реџепи, при извршување на работни активности на терен, вработени во фирмата што вршела ископ пронашле две пластични буриња исполнети со куршуми, рамки за автоматско оружје, мини и други експлозивни средства.
По пријавата, полициски службеници веднаш го обезбедиле местото, а специјализирани единици започнале со активности за безбедно подигнување и отстранување на пронајдените експлозивни средства.
Од СВР Тетово информираат дека се преземаат мерки за утврдување на потеклото на оружјето и муницијата, како и за откривање на лицата кои стојат зад нивното складирање.