Фудбалерите на Наполи ги срушија соништата на Милан за одбрана на титулата во Суперкупот на Италија, победувајќи ги со 2:0 во полуфиналниот натпревар одигран во Ријад.
Тоа беше вечер за заборав за тимот на Масимилијано Алегри.
Нервозата поради проблеми на теренот кулминираше на крајот од натпреварот, кога Масимилијано Алегри влезе во вербален конфликт со Габриеле Оријали, координатор на стручниот штаб на Наполи. Поради тој инцидент, Алегри и тренерот на Наполи, Антонио Конте, не се ракуваа по средбата.
По натпреварот, Конте детално опиша што се случило на аут-линијата:
„Тој кажа неколку лоши работи по ред. Првата беше „седни, идиоту“. Втората беше „имбецил“. Третата беше „идиоту“.
За разлика од бледиот Милан, Наполи одигра одличен натпревар.
Тимот на Конте, каде што настапува и македонскиот репрезентативец Елиф Елмас (беше стартер на мечот) беше солиден во одбраната и немилосрден во создавањето можности.
„Сакавме да одиграме силен натпревар против одличен тим полн со талентирани играчи. Нашиот стил на фудбал е многу енергичен, не се обидуваме само да се браниме. Среќен сум затоа што овие момци покажаа дека сакаат да се борат за овој трофеј“, рече Конте.