Голема чест ми е што денес официјално ја преземам функцијата селектор на српската репрезентација, изјави Вељко Пауновиќ, новиот селектор на српската фудбалска репрезентација, денес во Стара Пазова.
Пауновиќ официјално потпиша договор со Фудбалскиот сојуз на Србија до 2030 година во Стара Пазова.
„Радоста и задоволството се емоциите што доминираат во овој момент, иако веднаш по натпреварите со Англија и Латвија на сите им беше јасно дека сакам да продолжам да соработувам со луѓето од Сојузот, со репрезентацијата и со момците кои имаат задача да го вратат српскиот фудбал таму каде што му е местото“, рече Пауновиќ веднаш по потпишувањето на договорот, објави ФШ.
Пауновиќ претходно ја водеше српската репрезентација во натпреварите против Англија (0:2) и Латвија (2:1) во квалификациите за Светското првенство во 2026 година.
„Пред нас се многу предизвици, ќе бидам со моите луѓе и соработници на местото каде што пораснав, каде што стекнав многу пријатели и многу фудбалско знаење. На некој начин чувствувам потреба да вратам сè што сум стекнал како личност во мојата земја. Има многу детали на кои треба да работиме, најважен е човечкиот фактор, сè што носи одговорност на еден национален тренер. Пред сè, тоа е огромна чест“, додаде српскиот тренер.
Српската репрезентација ќе го има својот прв собир во март 2026 година.
„Многу сум практичен во врска со тоа. Март секако го означува почетокот во техничка смисла, но веќе имав осмислено и подготвено план кој сега почнав да го усовршувам. Јас сум човек од акција кој сака да работи. Има многу време до март, а времето е корисно само ако работниот план и акциониот план се имплементираат добро. Фокусиран сум на сè што сакам да направам дотогаш. Најважно ми е да ги посетам играчите, да воспоставам контакт – некои од нив ги познавам долго време и врската веќе постоеше, но има момци кои треба да ги запознаам уште подобро. И на лично и на карактерно ниво, како и со барањата што ќе ги имаме – не само во играта, туку и во нашиот секојдневен однос со тимот, дресот и српската репрезентација“, нагласи Пауновиќ.
Пауновиќ го освои Светското првенство во 2015 година со младинската репрезентација на Србија, кое се одржа во Нов Зеланд.
„Секој успех е дел од процес. Дел од план што треба успешно да се спроведе. На патот до крајната цел, има многу подеми и падови. Процес што мора да се види низ сите искуства – и за време на натпреварувањето и надвор од него. Најважни се вредностите, комуникацијата, односот што го имаме едни со други. Тоа е сè што треба да видиме со јасна визија за тоа каде сакаме да бидеме, како сакаме да стигнеме таму и дека ништо не нè одвлекува на тој пат – ниту успесите, ниту некои мали изгубени битки“, рече српскиот тренер и продолжи:
„Јавноста мора да знае дека патот е долг, но дека секоја станица по патот е цел што мора да ја достигнеме на начин што ни припаѓа. Ништо не е лесно. Сè што научив преку фудбалот – добар пристап, меѓучовечки односи – сето ова е потребно за да се создаде средина, здрава група луѓе кои сакаат да работат заедно и на крајот да бидат успешни. Нов Зеланд е прекрасна приказна и прекрасен пример, но сега мора да размислиме за нов пат што е пред нас и кон кој се движиме од овој момент“.
Враќањето на култот кон репрезентацијата е еден од приоритетите на новиот српски селектор.
„Јас сум практичен човек, но сум и малку класик кога станува збор за културата и историјата. Ставот кон амблемот и репрезентацијата е многу важен, но и кон нашата заедница и нашите луѓе. За мене, натпреварот помеѓу тренерот и новинарите отсекогаш бил убав настан. Сакав да ја реализирам таа идеја на крајот од оваа сезона, но објективните околности не ни дозволија – пред сè датумите и обврските на клубовите во претстојниот период. Секако не се откажувам. Мислам дека ваквите работи им се допаѓаат на публиката и јавноста и дека можат да испратат позитивна порака до сите. Тоа е атмосферата што ја бараме – сите да се обединиме и да се разбереме“, нагласи Пауновиќ.
Планирам да продолжам да работам со членовите на тренерскиот штаб што го собрав пред натпреварите со Англија и Латвија, додаде српскиот селектор.