Високата претставничка на Европската Унија за надворешни работи и безбедносна политика, Каја Калас, денес изјави дека една од клучните теми е како понатаму да се поддржи Украина и како да се подобри одбранбената подготвеност и способностите на Унијата.
– Јасно е дека Русија не сака мир и затоа мора да ја направиме Украина што е можно посилна за да биде подготвена да се брани во овој многу тежок период, рече Калас, според веб-страницата на Европската служба за надворешни работи (ЕЕАС).
Шефот на европската дипломатија нагласи дека „ова може да биде клучна недела за дипломатијата“.
– Вчера слушнавме дека разговорите во Америка биле тешки, но продуктивни. Сè уште не ги знаеме резултатите, но денес ќе разговарам со украинскиот министер за одбрана и украинскиот министер за надворешни работи, рече Калас.
Кога станува збор за тоа што Европа може да направи конкретно за да ја зајакне позицијата на Украина на преговарачката маса, Калас истакна дека ЕУ врши притисок врз Русија преку дополнителни санкции, а во исто време ѝ обезбедува на Украина воена, финансиска и хуманитарна помош.
Запрашан за противењето на Белгија на заемот за репарации, Калас рече дека Белгија има оправдани загрижености, но дека сите други земји-членки се подготвени да ги споделат тие ризици и дека Советот на ЕУ нема да замине во декември без решение за финансирање на Украина.
„Не мислам дека е исправно да се мешаме во одлуките на суверените земји за големината на нивните армии. Мојата поента е дека ако се врши притисок врз украинската армија, која не нападнала никого, треба да се изврши притисок и врз руската армија, што претставува ризик за сите соседни земји. Ако руската армија и воениот буџет се толку големи како што се сега, тие ќе сакаат повторно да го користат“, рече Калас, замолен да коментира за наводите за ограничувањата на руската армија.