Со завршувањето на главниот дел од тениската сезона, објавени се официјалните АТП заработки на најдобрите играчи за годината, кои вклучуваат заработки од сингл и двојки.
Листата јасно ја покажува големата финансиска разлика помеѓу освојувачите на титулите на Гренд слем и остатокот од елитата.
На врвот на листата, како што се очекуваше, се Јаник Синер и Карлос Алкараз, кои освоија Гренд слем титули, бројни Мастерс и турнири од серијата 500. Синер е суверено прв со вкупна заработка од 19.120.641 долари, додека Карлос Алкараз е веднаш зад него со 18.803.427 долари. Предноста на Синер е резултат на неговата победа на Завршниот Мастерс во Торино.
Интересно е што приходите на првите двајца тенисери во светот се приближно три пати поголеми од приходите на Александер Зверев кој е зад нив во поредокот.
Зверев (6.060.174 долари), Тејлор Фриц (5.475.728 долари), Феликс Оже-Алијасим (5.262.350 долари) и Алекс де Минор (5.241.711 долари) се пласираа помеѓу тандемот Синер-Алкараз и Новак Ѓоковиќ.
Новак Ѓоковиќ е на седмото место на листата со заработени 5.141.175 долари. Неговата заработка се состои од 5.127.245 долари во сингл, додека остатокот од приходите доаѓа од два настапи во двојки (во Бризбејн со Ник Кирјос и во Доха со Фернандо Вердаско).
Иако оваа листа е официјална, важно е да се истакне дека не е конечна и дека реалните заработки на тенисерите се значително повисоки. Вкупниот износ не ги вклучува приходите од егзибициски турнири, мешани двојки, бонуси и пари исплатени на играчите кои служеле како резервни играчи на Финалниот Мастерс.
На пример, само за победа на егзибицискиот турнир „Шест кралеви“ во Ријад, Синер собра дополнителни 6 милиони долари, додека Алкараз, Зверев, Ѓоковиќ и другите добија по 1,5 милиони долари од тој егзибициски турнир.