Претседателот на СДСМ Венко Филипче денеска на прес-конференција изјави дека не е планирана средба со претседателката на Европската комисија, Урсула Фон дер Лајен, која денеска е во посета на Скопје, во рамки на турнејата низ земјите од Западен Балкан и додаде дека во контекст на евроинтеграциите чекаат да испорача Владата.
Тој одговарајќи на новинарско прашање рече дека Владата е таа, која треба да посочи кој е следниот чекор за продолжување на патот кон евроинтеграциите.
-Ние чекаме државата да тргне напред, еве немаме план, ниту визија, ниту на тоа поле, ништо не се случува изминатите година и половина. Целосно се затвораат кластерите за Црна Гора и мошне е веројатно дека заедно со Албанија до 2029 година ќе станат земји-членки на ЕУ. Владата треба да каже што ќе правиме ние, кој е следниот чекор за ние да го продолжиме патот кон евроинтеграциите, рече Филипче.
Во однос на престојните локални избори истакна дека се посветени на работа на терен, на ангажирање на сите нивни членови, симпатизери.
-Ја користам оваа прилика да повикам да излезат на гласање в недела, мошне е важно да се излезе на гласање да се зголеми излезеноста. Имаме многу добри кандидати, сметам дека сме апсолутни фаворити во сите општини, а стратегиите за вториот круг ќе ги правиме од понеделник натаму, изјави Филипче.
За евентуални предвремени избори, Филипче одговори дека тие се подготвени кога било да настапат на парламентарни избори.
-Гледаме дека нема ниту еден добар индикатор во земјава, нема ниту една категорија граѓани, кои се задволни од владеењето на власта во земјава. Тоа не го кажуваме ние, ни го кажуваат тие на средбите, имаме катастрофални економски индикатори. Гледаме недоследност во изјавите на премиерот, еднаш ќе има, еднаш ќе нема предвремени избори, тој е свесен дека олкав број на гласови и пратеници колку што доби лани, никогаш нема да добие, затоа што луѓето се освестија, а ние сме подготвени кога било да настапиме на парламентарни избори, рече Филипче.
Во врска со фотографијата која се појави на социјалните медиуми, на која, како што објавија дел од медиумите, поранешниот претседател на СДСМ, Бранко Црвенковски бил на вечера во еден познат охридски ресторан се актуелниот градоначалник и кандидат за градоначалник на ВМРО-ДПМНЕ, Кирил Пецаков како и пратеникот на ВМРО-ДПМНЕ, Саше Донев и газдата на Пупе компани од Охрид, Филипче одговори дека може само да го цитира самиот Црвенковски.
-Во однос на сликата која излезе на социјалните медиуми вчера од поранешниот претседател на СДСМ, Бранко Црвенковски јас можам само да го цитирам поранешниот претседател на СДСМ, Бранко Црвенковски а тоа е: „Или си СДСМ или не си“.