Унгарскиот премиер Виктор Орбан изјави дека разговорите на самитот на Европската политичка заедница во Копенхаген покажале дека постои конфликт на идеи во врска со Русија, наведувајќи дека Унгарија, за разлика од некои други европски земји, не сака конфликт со Москва.
Во изјава за новинарите по самитот, Орбан ја отфрли можноста за учество на Унгарија во користењето на замрзнатите руски средства, објави Гардијан. Тој рече дека состанокот бил интересен, дури и возбудлив затоа што имал интелектуална содржина, што, како што изјави, не е секогаш случај.
Унгарскиот премиер, исто така, истакна дека голем број европски земји никогаш не биле окупирани од Русија, но дека овие земји се убедени дека се во право и дека имаат воен план за тоа како да ги победат Русите.
„Знаеме како изгледа руската воена машина. Не ни се допаѓа таа идеја. Значи, ние имаме мировен план, но другите имаат воен план, и таа конфронтација се случи“, рече Орбан.
Тој беше исто така многу критичен кон идејата за користење на замрзнатите руски средства за финансирање на понатамошна помош за Украина, велејќи дека белгискиот премиер им одржал на европските лидери „многу едукативна презентација“ која, како што рече, покажува дека идејата „не е многу ветувачка“, бидејќи Белгија прво ќе треба да добие гаранции дека другите земји ќе ја споделат својата правна одговорност за таков потег.
„Прашањето е чии се парите. Значи, ако се туѓи пари, Унгарија никогаш нема да ги допре. Ние не сме крадци, знаете. Овие пари не се наши“, рече Орбан.