Фудбалерот на Интер и аргентински репрезентативец, Лионел Меси, постигна договор со раководството на клубот од Мајами за продолжување на неговиот договор, објави ESPN.
Меси има договор со Интер до крајот на оваа година. Американските медиуми објавуваат дека раководството на Интер треба официјално да го објави продолжувањето на соработката со аргентинскиот фудбалер во следните две недели.
Меси (38) е член на Интер од 2023 година, а пред тоа играше за Пари Сен Жермен и Барселона. За клубот од Мајами одигра 75 натпревари и постигна 62 гола.
Американските медиуми потсетија дека Меси наговести по квалификацискиот натпревар за Светското првенство помеѓу Аргентина и Венецуела дека би можел да го продолжи договорот со Интер.
– Ја завршуваме сезоната на крајот од годината, а потоа започнуваат подготовките. Ќе видиме како ќе се чувствувам, се надевам дека ќе имам добра подготовка. Девет месеци минуваат брзо, а во исто време – долго време е – рече тогаш Меси.