Земјотрес со јачина од 6,2 степени според Рихтеровата скала го погоди полуостровот Камчатка, соопшти огранокот Камчатка на Обединетата геофизичка служба на Руската академија на науките.
Во соопштението се вели дека земјотресот е регистриран на 212 километри од Петропавловск-Камчатски во Тихиот Океан, на длабочина од 24 километри, објави ТАСС.
Агенцијата потсетува дека во среда наутро, на 30 јули, земјотрес со јачина од 8,8 степени според Рихтеровата скала е регистриран кај Камчатка, проследен со серија последователни потреси од пет и шест степени.
По земјотресот следеше цунами покрај брегот на неколку земји, вклучувајќи ги Русија и САД.
Обединетата геофизичка служба вчера наутро објави дека најмалку осум нови земјотреси се регистрирани покрај брегот на Камчатка во последните 60 минути.
Сеизмолозите проценија дека земјотресите имале јачина помеѓу 5,4 и 6,7 степени според Рихтеровата скала.