Измамник кој се претставува како американскиот државен секретар Марко Рубио контактирал со странски државни секретари, еден американски гувернер и еден конгресмен, испраќајќи им гласовни и текстуални пораки кои го имитирале гласот и стилот на пишување на Рубио користејќи софтвер базиран на вештачка интелигенција, објави „Вашингтон пост“.
Американските власти не знаат кој стои зад обидот за лажно претставување, но веруваат дека сторителот веројатно се обидува да манипулира со владини претставници „со цел да добие пристап до информации“, се вели во документот испратен до вработените во Стејт департментот од канцеларијата на Марко Рубио.
Користејќи текстуални пораки и апликацијата за шифрирани пораки Signal, која е во голема мера користена од администрацијата на Трамп, измамникот „контактирал најмалку пет лица надвор од Стејт департментот, вклучувајќи три државни секретари, еден американски гувернер и еден конгресмен“.
Кампањата за лажно претставување започнала кон средината на јуни кога измамникот создал сметка на Signal со името „[email protected]“ за да контактира со странски и домашни дипломати и политичари, се наведува во документот.
„Сторителот оставил гласовни пораки на Signal за најмалку две лица, а во еден случај, испратил текстуална порака со која го поканил лицето да комуницира преку Signal“, се наведува во документот.
Исто така, се наведува дека и други вработени во Стејт департментот биле цел на е-пораките за лажно претставување.
Кога биле прашани за документот, Стејт департментот рекол дека „ќе спроведе темелна истрага и ќе продолжи да спроведува заштитни мерки за да спречи вакви инциденти да се повторат во иднина“. Службениците одбиле да разговараат за содржината на пораките или имињата на дипломатите и службениците кои биле цел.