Во телефонски разговор во понеделник, американскиот претседател Доналд Трамп им рече на европските лидери дека рускиот претседател Владимир Путин не е подготвен да ја заврши војната во Украина бидејќи верува дека победува.
Тоа беше потврда за она што европските лидери долго време го веруваа за Путин, но тоа беше прв пат да го слушнат од Трамп.
Тоа, исто така, беше во спротивност со она што Трамп често јавно го кажуваше, дека верува оти Путин искрено сака мир. Белата куќа одби да коментира, осврнувајќи се на објавата на Трамп на социјалните мрежи во понеделникот за неговиот разговор со Путин: „Тонот и духот на разговорот беа одлични. Да не беше така, сега ќе го кажев тоа.“
Иако Трамп се чини дека ја прифатил идејата дека Путин не е подготвен за мир, тоа не го навело да го направи она што европските лидери и украинскиот претседател Володимир Зеленски тврдат дека треба да го направи: да ги засили напорите за борба против Русија, објави „Волстрит џурнал“.
Трамп претходно разговараше со европските лидери во неделата, еден ден пред неговиот двочасовен разговор со Путин. Потоа тој посочи дека би можел да воведе санкции доколку Путин отфрли прекин на огнот, според луѓе запознаени со разговорот. До понеделник, тој повторно се предомисли. Тој не беше подготвен да го направи тоа. Трамп рече дека сака брзо да започне разговори на ниско ниво меѓу Русија и Украина во Ватикан.
На разговорот во понеделник присуствуваа Зеленски, францускиот претседател Емануел Макрон, германскиот канцелар Фридрих Мерц, италијанската премиерка Џорџа Мелони и претседателката на Европската комисија Урсула фон дер Лајен.