Палестинскиот министер за здравство денес изјави дека 29 деца и постари лица починале од глад во Газа во последните денови и дека уште илјадници се во иста опасност.
Се очекува помошта да почне да пристигнува на жителите на Газа во четврток, откако Израел ги пушти првите камиони по 11-неделната блокада, но палестинските и хуманитарните претставници велат дека тоа е само „капка во морето“ од она што е потребно и дека ситуацијата би можела да биде полоша.
– Во последните неколку дена изгубивме 29 деца, изјави за новинарите палестинскиот министер за здравство Маџед Абу Рамадан, опишувајќи ги како „смртни случаи поврзани со глад“.
Подоцна тој појасни дека вкупниот број ги вклучува и постарите лица.
Тој, исто така, ги коментираше претходните изјави на шефот на хуманитарната помош на ОН дека 14.000 бебиња би можеле да умрат без помош, велејќи дека бројката е „многу реална“ и „можеби дури и го потценува обемот на хуманитарната катастрофа“.
Израел воведе блокада на сите испораки во март, велејќи дека Хамас ги запленува испораките, тврдење што милитантната група го негира. Порано овој месец, глобален мониторинг соопшти дека половина милион луѓе во Појасот Газа се соочуваат со глад.
Абу Рамадан рече дека само седум или осум од 36 болници во Газа делумно функционираат и дека повеќе од 90 проценти од медицинските залихи сега се на нула поради блокадата. „Моите информации се дека многу малку пратки влегле во Газа, околу сто камиони во јужните и централните зони“, рече тој.
Кога го прашале дали меѓу нив има медицински материјали, тој рекол: „Колку што знам… тоа е само брашно за пекари“.