Премиерот Виктор Орбан денес изјави дека партијата Тиса ја ужива поддршката на Европската народна партија (ЕПП) и дека, во замена за таа поддршка, ќе направи сè што ќе побара Брисел.
Орбан во интервју за јавното радио изјави дека партијата постигнала договор со лидерот на ЕПП, Манфред Вебер, според кој „Тиса добива поддршка од ЕПП“, објави МТИ.
Тој оцени дека ако условите за живот во Унгарија се влошат, тоа ќе и помогне на Тиса да дојде на власт, а партијата ќе прави сè што бара Брисел.
Според него, ако партијата Тиса дојде на власт, „Унгарија повеќе нема да биде земја без мигранти, бидејќи ќе дозволи влез на нелегални мигранти, нема да има заштита на децата бидејќи ќе дозволи ЛГБТ+ права, а Унгарија повеќе нема да биде во кампот што се залага за мир, бидејќи ќе им се придружи на земјите што ги поддржуваат воените операции во Украина“.
Орбан, исто така, истакна дека програмата на Тиса сега го вклучува и „барањето на Брисел“ за забрзан процес на пристапување за Украина.