Во Истанбул, каде денеска малку попладне беше регистриран силен земјотрес со јачина од 6,2 степени, се случија уште 127 последователни потреси, изјави турскиот министер за внатрешни работи Али Јерликаја.
Министерот за здравство, проф. д-р Кемал Мемишоглу соопшти дека во таа прилика се повредени 236 лица.
Бројните последователни потреси, од кои најсилниот беше 5,9 степени, ги вознемирија граѓаните и туристите во Истанбул и околината.
„Во земјотресот нема загинати, а граѓаните се повредени скокајќи од височина поради страв и паника. Во Истанбул се повредени 173 лица, во Текирдаг и Сакарија 24, во Јалова двајца и во Бурса тројца“, рече Мемишоглу.
Јерликаја изјави дека една зграда е урната во централната општина Фатих, а девет куќи се евакуирани, пренесе Хаберлер.
Итната помош примила нешто повеќе од 10.000 повици, но тоа не е многу за „мегаград“, рече Јеликаја.
„Во Истанбул, кој има 16 милиони жители, и е поголем од 131 земја во светот, пристигнаа само 10.084 повици од наши сограѓани. Повеќето од нив беа за информативни цели, некои граѓани се јавуваа загрижени за зградата во која живеат, а некои од повиците беа од здравствена природа“, рече Јерликаја.
Отворени се училишни дворови, гимназии и џамии за граѓаните кои се плашат да се вратат во своите домови, соопшти Кабинетот на гувернерот, јавува Anadolu Agency.
Турската Црвена полумесечина обезбедува поддршка со храна во местата за собирање по земјотресот во Истанбул, а повеќе од 1.000 вработени и волонтери и 65 мобилни угостителски возила дежураат низ Истанбул и продолжуваат да делат супа, храна, топли и ладни пијалоци и вода на граѓаните кои се плашат да преноќат во своите домови.
„Планираме да го зголемиме бројот на нашите вработени и волонтери на три илјади“, изјави претседателката на турската Црвена полумесечина, Фатма Мерих Јилмаз.
Според информациите на веб-страницата на Центарот за управување со катастрофи и вонредни ситуации (АФАД), во 12 часот и 49 минути е регистриран земјотрес со јачина од 6,2 степени според Рихтеровата скала, чиј епицентар бил во Мраморното Море, област Силиври во Истанбул.