Во сообраќајната несреќа, што се случи утрово околу три часот по полноќ, кај Рампа во Скопје, животите ги загубиле, 28-годишниот Александар Стаиќ, една година помладиот Борче Стаиќ, 28-годишниот Горан Ѓоргиев, и 27-годишните Живко Колев и Филип Биркаш.
Според МВР, возилото „БМВ“ со кое се превезувале пет лица изгубило контрола и излетало од патот.
Возилото удрило во подрумските простории на објектот на Пазарната инспекција при што од ударот сите лица починале.
Утрово целата локација на несреќата беше полициски обезбедена со полициски ленти и голем број на полицајци дури имаше и припадници на единицата Тигри.
Местото каде се случила несреќата е на местото каде се двои патот на Јужниот Булевар кој води кон Кисела Вода.
Момците сакале да свртат по патот кој се двои лево кон Тутунски Комбинат и поради голема брзина не успеале да ја фатат кривината и почнале да удараат во бетонските ступчиња покрај патот ја поткачиле и бандерата и се забиле во зградата на Пазарен Инспекторат.
Процените се дека автомобилот БМВ серија 5 од поновата генерација, во кој се наоѓале момците се движел со над 150 километри на час во моментот кога се обиделе да ја фатат кривината.