Генералниот секретар на НАТО, Андерс фог Расмусен, утре и задутре ќе престојува во работна посета на Грција каде се планирани средби со политичкиот врв на нашиот јужен сосед, јавува дописникот на МИА од Брисел.
Според информациите од седиштето на Алијансата во Брисел, Расмусен следните два дена во Атина ќе се сретне со грчкиот претседател Каролос Папуљас, со премиерот Андонис Самарас, како и со министрите за надворешни работи и за одбрана, Евангелос Венизелос, односно Димитрис Аврамопулос.
Иако од НАТО не соопштуваат за што точно првиот оперативец на најголемата воено-политичка организација на светот ќе разговара со државниот врв на Грција, сигурно е дека на агендата е и прашањето за името и спорот со Република Македонија.
Ова посебно што идната година во Велика Британија ќе се одржи Самит на НАТО, на кој е најавено дека ќе има прием на нови членки, при што од страна на македонските пријатели во Алијансата се врши притисок покрај Црна Гора, во овој пакет да влезе и Македонија.