Македонија пред светската публика ги претстави Галичкиот и Лазарополскиот кашкавал и сирењето од Бистра на четиридневниот биенален меѓународен фестивал на сирење, кој се одржа во градот Бра во северна Италија.
Во „Улицата на президиумите“ беа претставени голем број президиуми на сирења од целиот свет, додека на крајот од улицата, во „Куќата на биодиверзитетот“ се одржуваа бројни презентациии на активностите на Фондацијата за биодиверзитет.
Фестивалот овозможи и програми за деца кои вклучуваа едукативни работилници за храна.
Саемот, кој заврши денеска, беше проследен со вечерни концерти на плоштадот во Бра.
Се проценува дека оваа година настанот го посетија 250.000 посетители.
Годинашна тема на настанот беше „ Зачувај го сирењето“, со што од посетителите се бараше да донесат сирење кое би сакале да го спасат од исчезнување со негово додавање на листата на номинации за „Арка на вкусот“ што во суштина претставува каталог на производи загрозени од исчезнување.
Така, на овој начин, оваа година беа предложени 250 видови сирење.