Шведската министерка за европски работи Бригита Улсон, која веќе неколку дена претстојува во Белград поради намерата да учествува на Парадата на гордоста, е разочарана од одлуката за нејзино откажување.
Таа отворено зборува за одлуката во последен момент да се стави вето на парадата и човековите права кои се негуваат во ЕУ и кон кои Србија треба да тежнее доколку сака да стане нејзин член.
– Се укажуваше дека парадата ќе биде одржана, затоа и дојдов. Европската делегација е изненадена поради тоа. Негативната одлука нема да и помогне на Србија на патот кон реформите и приклучувањето во ЕУ, наведе Улсонова.
Шведската министерка смета дека за Србија е важно да продолжи и да ја форсира парадата, бидејќи се во прашање човековите права.
-Прашањето за човековите права е важно за сите нас и нема да се откажеме од него. Она што знам е дека ќе има притисок српската влада да дозволи одржување на Парадата на гордоста, бидејќи вака не може, нагласи Улсон.
Според неа толеранцијата на малцинствата и хомосексуалните права немаат врска со богатството на државата.
-Најдобар пример за тоа е Јужна Африка која е далеку од богатите држави, а сепак има либерални прописи кога е во прашање ЛГБТ популацијата, изјави таа.
Елена Георгиевска