Претседателот на Република Српска Милорад Додик денеска изјави дека БиХ е насилна заедница која е создадена вештачки, со потпишувањето на Дејтонскиот договор, а Србите се согласија на тој политички аранжман само за да се запре крвопролевањето и воените конфликти, за разлика од муслиманите кои никогаш не го прифатија Дејтонскиот мир.
„Муслиманите никогаш не го прифатија Дејтонскиот договор, бидејќи нивниот сон за муслиманска БиХ и намерното протерување на немуслиманите од БиХ беше уништен, па и денес на сите можни и невозможни начини се обидуваат да го спроведат планот на нивниот воен водач и идеолог Алија Изетбеговиќ, кој во 90-тите отворено кажа да е подготвен да го жртвува мирот за да ги оствари своите цели од „Исламската декларација“, рече Додик во изјава за Срна.
Додик посочи дека БиХ е неморална, непопуларна заедница во која еден народ – муслиманите – сака да ја наметне својата волја на конститутивните народи на БиХ – Србите и Хрватите.
„Еден од очигледните примери е денешниот датум, 25 ноември, кој муслиманите, слуги на фашистите, го одбележуваат како таканаречен „Ден на државноста на БиХ“. Се прашувам кој БиХ и чиј „ден на државноста“ кога веќе не постои Социјалистичка Република БиХ, а да биде иронијата уште поголема, ја уништија оние кои денес наводно слават ваква и таква БиХ, која веќе не постои“, посочи Додик.
Додик додаде дека БиХ нема закон за празници, но муслиманите, игнорирајќи ја волјата на Србите и Хрватите, воведуваат празници по нивна дискреција, обидувајќи се да ги наметнат на цела БиХ.