Новоизбраниот американски претседател Доналд Трамп ќе го назначи сенаторот од Флорида Марко Рубио за нов државен секретар, а републиканскиот претставник Мајк Волц за советник за национална безбедност во новата администрација, јавуваат американските медиуми, повикувајќи се на информирани извори.
Се очекува Трамп да го именува сенаторот Марко Рубио како негов номиниран за државен секретар, иако тој избор не е конечен, изјавија два неименувани извори за CBS News.
Рубио е голем противник на Кина, а тој се натпреваруваше со Трамп на прелиминарните избори на Републиканската партија во 2016 година.
Републиканците од јануари ќе имаат мнозинство во Сенатот и затоа се очекува тоа тело да го одобри именувањето на Рубио.
Трамп побара од републиканскиот претставник на САД, Мајк Волц, пензиониран офицер на Националната гарда и воен ветеран, да му биде советник за национална безбедност, изјави неименуван извор за АП.
Американската агенција наведува дека Волц, како и Рубио, е и противник на Кина и дека доколку стане советник за национална безбедност, ќе управува со американскиот одговор на војната во Украина, сојузот меѓу Русија и Северна Кореја и конфликтот во Блискиот Исток.
Синоќа, Трамп на својата социјална мрежа Вистина објави дека го назначил поранешниот републикански конгресмен Ли Зелдин, кој често гласал против законодавството за зелени прашања, вклучително и мерката за спречување на нафтените компании да ги зголемат цените, за шеф на Агенцијата за заштита на животната средина (ЕПА).
„Тој ќе обезбеди донесување правични и брзи одлуки за дерегулација за да се ослободи моќта на американските компании, а во исто време да се одржуваат највисоките еколошки стандарди, вклучително и најчистиот воздух и вода на планетата“, рече Трамп.