Најмалку 64 лица загинаа во невремето и поплавите во источна Шпанија, соопштија во средата локалните власти.
Тоа е најсмртоносната поплава во Шпанија во последните три децении, предизвикана од невиден дожд што во вторникот го погоди источниот регион на Валенсија, оставајќи ги патиштата и градовите под вода.
Возовите за Мадрид и за Барселона беа откажани поради поплавите, а училиштата и другите основни услуги беа суспендирани во најтешко погодените области, соопштија властите.
Иако најлошото помина, системот со низок притисок одговорен за невремето останува над шпанска територија денеска и утре.
Националната метеоролошка служба издаде жолто предупредување за некои области поради обилните врнежи.
Градоначалникот на Барселона, Жауме Колбони, ги замоли граѓаните на Барселона да не се приближуваат до крајбрежните области, ниту на плажите во Барселона.
Дождовите забележани во провинцијата Кастелон во Валенсија до пладне предизвикаа акумулација на 107,4 литри на метар квадратен во Морела и 92,2 во Кати, пренесува Europa Press.
Координативниот центар за итни случаи воспостави портокалово ниво на предупредување за дожд во северниот дел на внатрешноста на Кастелон и жолто ниво на предупредување за дожд во остатокот од покраината.