Русија го предупредува Израел да не ги напаѓа иранските нуклеарни постројки, изјави денеска рускиот заменик министер за надворешни работи Сергеј Рјабков.
Рјабков изјави дека Русија е во постојан контакт со Иран, без оглед на нивото на тензии во регионот на Блискиот Исток, пренесоа руските медиуми.
„Неколку пати предупредувавме и предупредуваме, дури и за хипотетичко разгледување на можноста за напад на нуклеарни постројки и нуклеарна инфраструктура“, рече Рјабков.
Израел објави, по ракетниот напад на Иран на 1 октомври, дека ќе возврати, вклучително и напади врз иранските нуклеарни централи. Кабинетот на израелскиот премиер Бенјамин Нетанјаху во вторникот објави дека Израел ќе ги слуша САД, но дека ќе одлучува за своите постапки врз основа на националните интереси.
„Вашингтон пост“ објави дека Нетанјаху и рекол на администрацијата на американскиот претседател Џозеф Бајден дека Израел ќе ги нападне иранските воени, а не нуклеарни или нафтени постројки.