Германската министерка за надворешни работи Аналена Бербок денеска изјави дека републиканскиот кандидат на претстојните избори во САД, Доналд Трамп, шири „лажни вести“ за нејзината земја, но во исто време најави дека нејзината влада ќе ги одржува односите со администрацијата на Трамп доколку тој победи во трката за втор мандат во Белата куќа во ноември.
„Навистина бевме малку изненадени што имаше лажни вести, да не речам лаги, за мојата земја. Но, очигледно е дека имаме интензивен интерес да продолжиме со овој однос на доверба со САД“, рече таа во интервју за ТВ Блумберг во Њу Јорк.
Бербок се осврна на изјавата на поранешниот претседател за време на дебатата со демократската кандидатка Камала Харис, во која тој рече дека транзицијата на Германија кон обновлива енергија не успеала и дека земјата прибегнала кон изградба на „нормални“ електрани.