Околу 420 илјади денари штета претрпела албанската државјанка С.М.(31) откако засега непознати сторители изминатата ноќ извршиле тешка кражба во станот во кој таа времено претстојувала на улицата „Видоја Смилевски-Бато“ без број во Тетово, информираше денеска портпаролот на СВР Тетово, Марјан Јосифовски.
– Крадците го искористиле нејзиното отсуство, насилно ја отвориле влезната врата од станот, целосно ја пребарале внатрешноста и од спалната и другите простории одзеле повеќе парчиња разновиден златен и накит од „Сваровски“, три женски часовници, два мобилни телефони како и 2.000 евра во разни апоени кои биле во паричник, 30 илјади денари и лаптоп. Вкупната материјална штета според С.М се проценува на околу 420 илјади денари, рече Јосифовски.
Полицијата извршила увид и превзема активности за откривање на сторителите.