Американската војска денеска соопшти дека нејзините сили уништиле два фрлачи на противбродски крстосувачки ракети во област контролирана од бунтовниците Хути во Јемен.
Централната команда на САД објави на социјалната мрежа X дека ракетните фрлачи „претставуваа непосредна закана за американските и коалициските сили и трговските бродови кои транзитираат низ регионот“.
Хутите поддржани од Иран, кои контролираат поголем дел од Јемен, извршија десетици напади со беспилотни летала и ракети врз Црвеното Море и Аденскиот Залив од ноември минатата година.
Хутите велат дека со овие напади ги поддржуваат Палестинците во Појасот Газа.
Припадниците на тоа милитантно движење лансираа и неколку балистички ракети и беспилотни летала кон јужниот израелски град Еилат.