Распоредот со броеви на Клиниката за онкологија предизвика паника кај пациентите кои денес примаат онколошка терапија, а се дојдени од градовите ширум Македонија.
Пациентите утрово дошле во поголем број на Клиниката за да ја примат својата терапија, а недоразбирањето со бројчињата и поделбата на истите направило гужва која ги исплашила пациентите дека нема да стигнат на ред да примат терапија.
– Се создаде мала паника, бидејќи подоцна се почна, а пациентите веќе беа дојдени. Сите доаѓаме порано, ние од Прилеп стигнавме во 7 часот со цел да фатиме ред за бројче за хемотерапија, а во меѓувреме да одиме на преглед кај специјалистот онколог. Лекарите и сестрите прават натчовечки напори, на една од сестрите и се слоши утрово.
Видливо е дека недостасува персонал на клиниката и дека таа нема капацитет да ги опслужи сите пациенти од Македонија. Во Битола има онколошко одделение, но ние наместо 40 патуваме 140 километри за сопругата да добие терапија – истакна граѓанин од Прилеп за „А1он“ кој наизменично со сопругата се менуваа во чекалната која беше преполна со пациенти за да слушнат кога некоја од сестрите ќе им го изговори бројчето.