Претседателот Александар Вучиќ денеска изјави дека српскиот народ на Косово е изложен на брутален прогон и дека никогаш нема да прифати независно Косово и најави дека поради усвојувањето на резолуцијата за Сребреница, ќе бара и усвојување на резолуција за страдањата на Србите од рацете на Германците во Втората светска војна, како и од усташите во Јасеновац.
Вучиќ, пред разговорот со српскиот патријарх Порфири и претседателот на Република Српска, Милорад Додик, рече дека усвојувањето на резолуцијата за Сребреница ќе ја отвори Пандорината кутија.
„Русите наскоро ќе иницираат барање да се прогласи за геноцид германското убивање на рускиот и советскиот народ за време на Втората светска војна. Ние ќе го бараме истото за она што го направија Германците во Србија и за она што го направија хрватските усташи во Јасеновац. Но, да не кажам дека тоа ќе отвори многу други прашања за Турција и за некои други западни сили, од Индијанци до многу други“, рече Вучиќ.
Во секој случај, како што вели, тоа е многу тешко прашање, бидејќи го покажува односот на поединци во регионот, како и на некои светски сили.