Градоначалникот на Општина Центар Андреј Жерновски на жители на Центар им додели решенија за легализација. За последните 30 дена службите на општината изготвија 102 решенија, а за 4 и пол месеци, откако е дојдено новото раководство на општината изготвени се 354 решенија. Како споредба – претходното раководство успеваше да заврши само по 400 предмети годишно.
Заложба на секоја администрација, рече градоначалникот Жерновски, е да работи во интерес на граѓаните.
„Пред еден месец си зададовме амбициозна цел да заокружуваме по 100 решенија месечно. Зададеното го завршивме и денеска, за 30 дена имаме 100 решенија. Ова не е критика како се работело претходно, но е репер како треба да се работи“, рече Жерновски.
На граѓаните им порача дека вратите од општината се секогаш отворени бидејќи вработените во општината, советниците и тој самиот како градоначалник работат за интересите на жителите на Центар.
Граѓаните задоволни, бидејќи велат – заврши нашата голгота. Некои по 10 години талкање по општинските лавиринти успеаа денеска да ги добијат решенијата.
