Министерот за надворешни работи, Бујар Османи го повтори партискиот став на неговата партија ДУИ дека волјата на народот мора да се почитува и не треба да се омаловажува народ кој допрва ќе треба да гласа, а без да се слушне неговата волја не е чесно да се зборува за коалиции.
За изјавата на Изет Меџити дека македонските партии не сакаат да коалицираат со ДУИ, Османи рече дека целта на ДУИ не е да бидат симпатизирани од другите партии.
„Нашата цел не е да не’ симпатизираат. Таа извртена логика дека албанските политички партии треба да се борат за симпатиии кај македонските партии е навредлива. Уште понавредливо е да зборуваме за коалиција на девет дена пред избори. Фактот дека политичките партии прават калкулации, за мене е потценување на демократијата и достоинството на секој народ“, рече Османи.
Европскиот фронт деновиве ќе одлучи како ќе настапи во вториот круг, односно кој од претседателските кандидати ќе го поддржи.
За него, слоганите на ВМРО-ДПМНЕ, се обид да се омаловажи достоинството на Албанците.
„Мицкоски успеа да врати едно сеќавање кај Албанците за 100 годишното ропство, омаловажување и починување. Да иритира нерв кој мислевме дека е длабоко сокриен. Да врати сеќавање од Југославија и Рахман Мурина. Овој обид за омаловажување на достоинството на секој Албанец го мобилизираше народот. Не само тие што ме поддржуваа, туку и гласачите на опозицијата кои не гласаа за мене. Велат веќе не е прашање помеѓу Европски фронт и Вреди, ова е битка за нашето достоинство.
Времето на Мурина е завршено оддамна и закопано. Да повикате државата да биде повторно твоја е најсрамниот и најшовцинистичкиот повик што може да се претстави во една мултиетничка држава. Национализмот раѓа национализам. Овие сили го вратија тоа чувство“, рече Османи.