Двајца високорангирани офицери на грчката полиција поднесоа денеска оставки поради минатонеделното убиство на музичарот антифашист, за кое е обвинет наводен приврзаник на неонацистичката партија „Златна зора“.
Тие поднеле оставки поради можните пропусти на полицијата при идентификувањето на лицата кои се собрале пред локалниот огранок на „Златна зора“ во Халкиди, вооружени со предмети кои се сметаат за оружје – како пендреци, заштитни шлемови и штитови.
Според соопштението на Министерството за јавен ред и мир, генералите задолжени за јужна и централна Грција Јоанис Дикопулос и Апостолос Касканис, понудија оставки на генералниот секретар на Министерството Анастасиос Андреулакос, кој ги прифати.
Според дел од западни медиуми, се води истрага поради можна поврзаност на полициското одделение со „Златна зора“, и се наведува дека неколку началници на полицијата на островот Евија се суспендирани поради тоа што не го истражиле седиштето на крајната десничарска партија во близина на полициската станица каде било држено оружје.