Екологистите од четири еколошки друштва од Скопје, Битола, Охрид и Велес од утре ќе собираат 10 илјади потписи во 20 градови во Македонија, за дополнување на Законот за животна средина.
Екологистите, како што најавија на заедничката прес-конференција во Велес, ќе побараат од граѓаните со својот потпис да ја подржат нивната иницијатива за дополнување на Законот за животна средина, да не се дозволи градење загадувачка индустрија на растојание помало од пет километри од населените места.
Ненад Коциќ од ЕД „Вила Зора“ од Велес рече дека со ова барање првенствено ќе се надмине грешката од Велес, каде Топилницата беше изградена и работеше среде град и ги труеше и им го загрозуваше зравјето на граѓаните над 30 години.
– Затоа бараме ваква тешка загадувачка индустрија во иднина да не се гради во ниедно населено место во Македонија, а со тоа ќе се заштити нашата и иднината на нашите деца кои имаат право да живеат во почиста и поздрава животна средина, рече Коциќ на денешната прес-конференција.
Тој најави дека во наредните денови потписите од граѓаните ќе ги собираат на плоштадите во 20 градови во земјава. Потоа собраните 10 илјади потписи ќе ги достават до Собранието на Република Македонија.
– Од пратениците, без разлика на која партија и припаѓаат, ќе бараме со своето гласање да ја подржат нашата иницијатива која значи подобра и поздрава животна средина за сите граѓани на Македонија, потенцира Коциќ.