Пожарот што во понеделникот избувна во Тексас досега се прошири на 445.000 хектари и брзо стана „најголемиот и најразорниот“ во историјата на таа американска сојузна држава.
Си-Би-Ес Њуз јавува дека пожарникарите досега успеале да го локализираат пожарот само на три отсто од територијата зафатена од пожарот кој почнал да се шири од округот Хачинсон.
Американската телевизија објави дека едно лице загинало во пожарот.
Поради пожарот привремено беше прекината работата на „Пантекс“, главната фабрика за производство на нуклеарно оружје, која се наоѓа на околу 50 километри од градот Амарило.
Британскиот весник Индипендент пишува дека производството било прекинато во вторникот вечерта.
– Го евакуиравме нашиот персонал, несуштински персонал, од фабриката, само како мерка на претпазливост – изјави Леф Пендерграфт, портпарол на Канцеларијата за производство на Националната управа за нуклеарна безбедност во „Пантекс“.