Премиерката на Србија, Ана Брнабиќ изјави дека руските безбедносни служби имале информации за подготовка на немири во Србија.
Ана Брнабиќ потсети дека уште пред изборите предупреди дека дел од опозицијата ќе се обиде да ги оспори изборните резултати и да ја преземе власта во Србија со насилни средства, што кулминираше со вечерашниот напад на градското собрание на Белград.
Брнабиќ се заблагодари затоа што руските безбедносни служби ги споделија информациите до кои дошле со нивните српски колеги.
– Ова веројатно нема да биде популарно кај оние од Западот, но чувствувам дека е важно да застанеме во одбрана на Србија и да им се заблагодарам на руските безбедносни служби што ги имаа овие информации и ги споделија со нас – рече Брнабиќ.
Српските државни органи потоа ја споделија оваа информација со други претставници на меѓународната заедница, кои ја отфрлија како руска дезинформација.
– Сите останати велеа дека тоа е дистрибуција на лажни вести – изјави Брнабиќ.