Од медиуми и кругови блиски на власта излегоа обвинувањата и невистините во врска со одлуката на Советот на Општина Центар за комунален ред. Градоначалникот Андреј Жерновски одговорајќи на новинарски прашања посочи дека она што цинично го напишаа и кажаа одредени новинари блиски до власта, но и други одредени кругови е само непознавање на законите и одредбите или намерно срочени информации за да и’ се наштети на општината и нему како градоначалник на истата.
Жерновски ги покажа законите и одлуките од кои јасно се гледа дека општината морала да постапи и да ги почитува законите и инспекцискиот надзор. Законот за комунални дејности во Службен Весник е објавен на 26.06.2012 и во член 12 е пропишано дека советот на општините, односно Советот на Град Скопје треба да донесат одлука за комунален ред и мерки за нејзино спроведување.
Здружението на комунални инспектори заради имплементација на законот предлага одлука во која во член 160 стои: “Не е дозволено чување на кучиња со ќуд со постојано лаење и завивање“.
Во месец февруари и во месец јуни во Општина Центар е извршен инспекциски надзор и по констатираната фактичка состојба се наложува носење на одлука за комунален ред.
Еве што друго е предвидено во одлуката а што е во согласност со европските практики:
„Сопствениците се должни кучињата да ги чуваат во своите дворови, а надвор може да се изнесат само со корпа на устата и подводник. Изметот од кучињата сопственикот е должен да го собере во кеса и да ги остави во корпи наменети за таа цел. Сопствениците на ловечки кучиња, пак, се должни да ги држат врзани кога минуваат низ територијата на Центар“.
Градоначалникот Жерновски посочи дека, како и секогаш, така и сега е отворен за сите сугестии и барања на жителите на Општина Центар. Подготвен е да ги сослуша граѓаните, но и да им објасни зошто е донесена таквата одлука.
За утре, на барање на градоначалникот Жерновски, е закажана средба со претставници на здружението за заштита на правата на животните “Анима Мунди“ – Скопје.