СДСМ денеска обвини дека директорката на основното училиште „Христијан Тодоровски-Карпош“ во Ранковце која е осудена за злоупотреба на службената положба, не дозволува да се направи примопредавање на должноста.
Градоначалникот на општина Ранковце, Момчило Алексовски на прес-конференција рече дека директорката Слаѓана Николовска од Основниот суд во Крива Паланка е прогласена за виновна за злоупотреба на службената положба и оти против неа се водат уште кривични постапки.
– Училишниот одбор не функционира, а Николовска не присуствува на седниците на Совет на општина Ранковце, ниту соработува со мене како градоначалник, рече Алексовски, додавајќи дека членови на ВМРО-ДПМНЕ вербално им се закануваат на вработени во општината и на нивните семејства.
Тој информира дека за случајот е известен училишниот одбор, Државниот просветен инспекторат и Министерството за образование и наука.