Шефот на платеничката група Вагнер, Евгениј Пригожин во саботата изјави дека неговите борци и тој се подготвени да загинат за татковината и ослободувањето на рускиот народ од сегашното воено раководство.
-Подготвени сме да умреме, сите 25.000 – рече Пригожин во новата аудио порака на Telegram.
„Бидејќи гинеме за татковината, умираме за рускиот народ, кој мора да се ослободи од оние што го бомбардираат цивилното население“, нагласи шефот на Вагнер, кој е во одмаздничка кампања против руското воено раководство.
Пригожин во претходна порака рече дека собориле руски воен хеликоптер кој отворил оган врз колона цивили, но не наведе детали како локацијата на наводниот инцидент. АФП не можеше да го потврди неговото тврдење.
Шефот на Вагнер ја обвини руската војска за „уништување“ на неговите борци и вети дека ќе му се одмазди на рускиот воен врв, по што руската разузнавачка служба ФСБ отвори кривична постапка против него за повикување на вооружен бунт. Пригожин тврдеше, без да обезбеди докази, дека военото раководство убило голем број негови борци во воздушен напад, што Русија го негираше.
Во Москва се зајакнати безбедносните мерки, објави новинската агенција ТАСС, пред се околу најважните владини локации и инфраструктури во главниот град. Властите на јужната област Воронеж соопштија дека ситуацијата е под контрола и дека се преземаат безбедносни мерки.